زيت السمسم



من فتره قصيره سمعت من اخصائية التغذية و الصحه (عليا المؤيد) عن فوايد زيت السمسم للبشره و شلون انه ممكن نستخدمه كمرطب و أيضا كواقي للشمس (اضغط هنا)، فقلت التجربة خير برهان.

صارلي الحين يومين استخدمه بعد ما اغسل ويهي بالصابون الصبح و بالليل. الصرااحه و من غير مبالغه من اول مره حسيت بفرق وواايد عجبتني النتيجه. شكلي بستغني عن كريم الليل و النهار.

و الأفضل بعد تستخدمون زيت سمم بكر و عضوي.

من فوائد زيت السمسم اللي سمعتها من يدتي (جدتي) ان اللي يعاني من كحة ناااشفة تقز ياخذله قفشه صغيره هرده (طحينية) ، و اللي تطلعله حبة عالشفايف او الفم من داخل هم يحط عليها هرده (طحينية) و يخليه فتره لچم يوم راح تلاحظون انها خفت و الألم بدا يختفي.. الصراحه زيت السمسم معجزه و عن تجربة نقلت لكم هالكلام.

سبحان الله

 

تحديث:

اممم.. لما وقفت استخدام كريم الليل و النهار و بس استخدمت زيت السمسم حسيت بشرتي جفت شوي, فرجعت استخدم الكريمات  و ظليت استخدم زيت السمسم تحت الكريم.

و بحاول ازيد كمة الماي اللي اشربها .

My Favorite Winter Drinks: Hot Chocolate and Chai Latte

بدا الشتا و الجو صار ابرد و ابرد و دايما بهالجو الحلو اللي يقرص الخدود احب اشرب الهوت جوكليت و الجاي لاتيه اللي انا اسويهم.
طريقتي للهوت جوكليت:
1-عالنار اسخن الحليبه و اذوب فيها صبع كاكاو فليك
2-و اذا ذاب الفليك احط قفشه صغيره نوتيلا و طبعا كل شي عالنار
3- اخر شي حطيت ماشملو  وحده في الكوب و صبيت الهوت جوكليت عليها
كان شي لذيييييييذ 🙂
أما الجاي لاتيه واايد احبه و كله اطلبه اذا رحت قعدت في قهوه .  ذاك اليوم اشتهييته حدي  و كنت بالبيت فقلت خل اجرب اسويه بالبيت و  الحمدلله ضبط 🙂 :
1- افوح حليبه عالنار و احط فيها عود دارسين و حبتين هيل و حبة مسمار و اخليهم يفوحون و بالكوب احط قفشة عسل اصلي (مااحب عسل الجمعيه احس كله شكر) و اصب الحليبه

الريحه خنييييينه

حسافه ما صورت ان شاء الله المره اليايه اصور و احط الصور